Zbardhen detaje të reja nga përplasja me armë zjarri që ndodhi në Laç, ku mbetën të plagosur pesë të rinj dhe një grua 58-vjeçare. Ngjarja është pasojë e një konflikti të nisur disa ditë më parë për motive të dobëta, që kulmoi me shkëmbim zjarri mes dy grupeve.
Sipas pamjeve të kamerave të sigurisë dhe hetimeve paraprake, dy grupet — njëri me tre persona dhe tjetri me dy — po lëviznin me automjete. Pasi u ndalën, të rinjtë zbritën nga makinat dhe u përfshinë në një përplasje të armatosur.
Nga shkëmbimi i zjarrit mbetën të plagosur katër persona që janë dërguar në Spitalin e Traumës. Ndërkohë, një person tjetër, i identifikuar nga policia si pjesë e grupit me dy vetë, është larguar nga vendngjarja dhe dyshohet të jetë gjithashtu i plagosur. Ai është shpallur në kërkim.
Njëri nga të plagosurit që ndodhet në spital ka qenë në të njëjtën makinë me personin e shpallur në kërkim. Së bashku, ata janë përplasur me tre të rinjtë e tjerë, po ashtu të plagosur dhe aktualisht në spital.
Policia ka sekuestruar një armë tip pistoletë pranë vendit të ngjarjes, por ende nuk është përcaktuar kujt i përkiste. Dyshohet se janë përdorur edhe armë të tjera, përfshirë kallashnikovë.
Gjatë shkëmbimit të zjarrit, një plumb aksidental goditi në këmbë një kalimtare 58-vjeçare, e cila ndodhej pranë kishës së Laçit duke shitur qirinj për besimtarët.
Hetimet vijojnë për identifikimin dhe arrestimin e të përfshirëve dhe për përcaktimin e saktë të armëve të përdorura në ngjarje.