Policia ka mundur të identifikojë autorin e ngjarjes së rëndë që tronditi Laçin, ku 5 persona mbetën të plagosur nga të shtënat me armë zjarri. Shtetasi K. Kamberi dyshohet të jetë autori i këtij sulmi, dhe forcat e policisë janë vënë në ndjekje të tij. Gjithashtu policia ka gjetur dhe armën që dyshohet se është përdorur nga autori i krimit.
Ngjarja ka ndodhur rreth orës 13:30, pranë ish-Gjykatës së Kurbinit, ku një konflikt i çastit mes disa personave ka degjeneruar në të shtëna me armë. Të plagosurit janë shtetasit L. I., A. Gj., G. N., A. N. dhe D. Gj., të cilët janë transportuar menjëherë për ndihmë mjekësore në spitalin e Traumës në Tiranë.
Pas marrjes së njoftimit, shërbimet e Policisë kanë reaguar shpejt dhe janë dërguar në vendin e ngjarjes, ku kanë shoqëruar disa persona. Ndihmës për këtë operacion iu ka bashkuar dhe Forca Kombëtare e Sigurisë Njësia Shkodër. Grupi hetimor, nën drejtimin e Prokurorisë, po punon për sqarimin e plotë të rrethanave të ngjarjes dhe për kapjen e autorit të identifikuar, K. Kamberi.