Dy nga pesë të plagosurit nga të shtënat me armë zjarri në Laç ndodhen në gjendje të rëndë shëndetësore dhe po trajtohen në kujdes intensiv në Spitalin e Traumës në Tiranë. Ata janë Arian Ndoj dhe Geri Bitri, të cilët kanë pësuar plagë të rënda në zonën e legenit.
Të plagosurit e tjerë janë Daniel Gjeloshi, 26 vjeç, Liridon Ismaili, 26 vjeç dhe Angjelina Gjezaj, 58 vjeç. Ata janë dërguar në spital dhe ndodhen në gjendje stabile, por kanë pësuar dëmtime në gjymtyrët e poshtme.
Ngjarja ka ndodhur pasditen e së premtes pas një konflikti mes disa të rinjve, duke lënë të plagosur katër persona dhe një grua, që ishte shitëse ambulante pranë vendit të ngjarjes.
Policia ka shoqëruar disa persona lidhur me ngjarjen, dhe operacionet për kapjen e autorit vazhdojnë. Grupi hetimor, nën drejtimin e Prokurorisë, po punon për zbardhjen e plotë të rrethanave dhe për dokumentimin e ngjarjes.
Njoftimi i Policisë:
“Rreth orës 13:30, pranë ish-Gjykatës së Kurbinit, si pasojë e një konflikti të çastit mes disa personave, kanë mbetur të plagosur shtetasit L. I., A. Gj., G. N., A. N. dhe D. Gj., të cilët janë dërguar menjëherë në spitalin e Traumës për ndihmë mjekësore më të specializuar. Shërbimet e Policisë janë angazhuar menjëherë, duke shoqëruar disa persona dhe duke angazhuar Forcat Kombëtare të Sigurisë Njësia Shkodër. Grupi hetimor po punon për zbardhjen e rrethanave dhe për kapjen e autorit të ngjarjes.”