Laçi është tronditur këtë mesditë nga një ngjarje e rëndë me armë zjarri, e cila ka lënë të plagosur pesë persona. Sipas informacionit të parë, tre të rinj janë konfliktuar me armë dhe ndodhen në gjendje të rëndë, duke u transportuar urgjentisht në Spitalin e Traumës.
Ndërkohë, një grua e moshuar, e cila po shiste qirinj në afërsi të vendngjarjes, është plagosur gjithashtu. Pamjet e siguruara nga JOQ tregojnë gruan duke bërtitur: “O vdiqa, mbarova”, duke kërkuar ndihmë menjëherë pas të shtënave. Po ashtu një nga të rinjtë e plagosur shihet në rrugë, teksa policia dhe kalimtarët i ndihmojnë në pritje të ambualncës.
Policia ka mbërritur menjëherë në vendngjarje dhe ka nisur hetimet për zbardhjen e rrethanave të ngjarjes. Disa persona janë shoqëruar për pyetje, por ende nuk janë dhënë detaje të plota mbi motivin e konfliktit dhe personat e përfshirë.
Në këtë moment, dyshohet se sherri ka shpërthyer mes të rinjve, por hetimet vijojnë për të zbuluar plotësisht ngjarjen. Forca të shumta policore janë në vendin e ngjarjes, ndërsa autoritetet po punojnë për kapjen e personave të përfshirë në këtë incident të rëndë.