Detaje të reja tronditëse janë zbuluar lidhur me rrëzimin tragjik të avionit të Air India në Ahmedabad, ku humbën jetën mbi 300 persona. Kapiteni i avionit, Sumit Sabhawal, dërgoi një mesazh alarmues pak sekonda para përplasjes, duke njoftuar se avioni po “humbiste fuqi” dhe nuk arrinte të ngjitej në lartësi.
“Nuk ka shtytje, po humbasim fuqi, nuk mund të fitojmë lartësi”, ishte komunikimi i fundit i kapitenit me kullën e kontrollit, përpara se lidhja të ndërpritej plotësisht.
Avioni Boeing 787-8 Dreamliner, me destinacion Londrën dhe me 240 pasagjerë në bord, u rrëzua në një zonë të populluar të Ahmedabadit disa minuta pas ngritjes. Vetëm një pasagjer nga sedilja 11A arriti të shpëtonte me jetë falë daljes së emergjencës.
Autoritetet indiane kanë nisur një hetim të gjerë, ndërsa ekspertë nga disa shtete, përfshirë SHBA-në, Mbretërinë e Bashkuar dhe përfaqësues të Boeing, do të bashkëpunojnë për zbardhjen e shkaqeve të aksidentit.
Sipas Mary Schiavo, ish-inspektore në Departamentin Amerikan të Transportit, India do të udhëheqë hetimin, por përfshirja ndërkombëtare është standarde në raste të tilla. “Do të jetë një hetim shumëpalësh me përfshirjen e prodhuesve dhe vendeve të pasagjerëve”, deklaroi ajo për CNN.
Autoritetet pritet të përqendrohen në kutitë e zeza të avionit, të cilat përmbajnë të dhëna të rëndësishme për zbardhjen e dinamikës së fluturimit. Drejtoria e Aviacionit Civil në Indi ka konfirmuar se një sinjal urgjence u dërgua menjëherë pas ngritjes, çka ka ngushtuar pistat kryesore të hetimit.
Tragjedia konsiderohet një nga më të rëndat në historinë moderne të aviacionit në Indi.