Një i burgosur shqiptar është zhdukur pa lënë gjurmë në Australi pasi u lejua të marrë pjesë në ceremoninë mortore të vëllait të tij në Melbourne, në një ngjarje që ka vënë në alarm autoritetet vendase.
Bëhet fjalë për 47-vjeçarin Orijol Rukaj, i cili ndodhet në arrati prej më shumë se gjashtë javësh. Sipas policisë, ai përfitoi nga pjesëmarrja në funeral për t’iu shmangur mbikëqyrjes së efektivëve që e shoqëronin dhe nuk u kthye më në institucionin e vuajtjes së dënimit.
Autoritetet australiane bëjnë me dije se ceremonia mortore kishte mbledhur një numër të madh pjesëmarrësish, çka dyshohet se ka favorizuar arratisjen e tij.
Rukaj përballet me akuza për trafik droge, ndërsa Policia e shtetit të Viktorias pretendon se ai ka lidhje me grupe të krimit të organizuar me origjinë shqiptare.
Në kuadër të operacionit për kapjen e tij, hetuesit kanë ushtruar kontrolle dhe kanë marrë në pyetje familjarë e bashkëpunëtorë të mundshëm në rreth 20 adresa të ndryshme në zonën e Melbourne. Megjithatë, deri më tani nuk ka asnjë gjurmë të të arratisurit.
Policia beson se 47-vjeçari vazhdon të fshihet brenda zonës metropolitane të qytetit, ndërsa hetimet kanë identifikuar disa persona që dyshohet se kanë ndihmuar në organizimin e arratisjes.
Sipas autoriteteve, disa prej të dyshuarve ndodhen aktualisht jashtë Australisë. Një person u ndalua për t’u marrë në pyetje në aeroportin e Melbourne, por më pas u lirua pasi nuk u ngritën akuza ndaj tij.
Operacioni për lokalizimin dhe arrestimin e Rukajt vijon, ndërsa policia ka kërkuar ndihmën e publikut për çdo informacion që mund të çojë në kapjen e tij.