Policia e Tiranës ka goditur një rrjet kriminal të trafikimit të qenieve njerëzore në kuadër të operacionit “Crossline”, duke çuar në arrestimin e një 20-vjeçari nga Tirana, i identifikuar si K. P. Ky shtetas dyshohet se në bashkëpunim me një person tjetër me shtetësi kolumbiane, ende të paidentifikuar, organizonte sjelljen e femrave të huaja në Shqipëri për t’i shfrytëzuar në prostitucion.
Sipas të dhënave hetimore, viktimat ishin gra të rekrutuara nga Kolumbia dhe Panamaja, të cilat ishin trafikuar në Tiranë për t’u shfrytëzuar seksualisht.
Gjatë operacionit, policia kapi në flagrancë 7 gra të huaja – 6 kolumbiane dhe 1 panameze – të moshave 27 deri në 35 vjeç, të cilat ushtronin prostitucion në një apartament me qira ditore në rrugën “Gjon Muzaka”.
Në apartamentin e kontrolluar u gjetën dhe u sekuestruan para të dyshuara si të ardhura nga aktiviteti i paligjshëm, 7 telefona celularë dhe materiale të tjera që do të përdoren si prova në vijim të hetimit.
Ndërkohë, vijojnë kërkimet për bashkëpunëtorin kolumbian dhe për zbardhjen e plotë të veprimtarisë së këtij rrjeti të trafikimit për qëllime prostitucioni.