Janë bërë publike emrat e 11 personave të dyshuar si anëtarë të një grupi të strukturuar kriminal, të drejtuar nga Jetmir Pepa alias Jetmir Marashi, të cilët akuzohen për trafikimin e mbi 7 tonëve kokainë.
Sipas hetimeve të SPAK, grupi ka operuar gjatë viteve 2019–2021 në disa shtete, përfshirë Amerikën Latine, Belgjikë dhe Holandë, duke realizuar disa episode të trafikut ndërkombëtar të drogës, kryesisht drejt porteve të Roterdamit dhe Amsterdamit.
Emrat e publikuar të të dyshuarve:
- Aleks Pepaj alias Shkëlqim Pepaj
- Jetmir Pepaj alias Jetmir Marashi
- Albert Pjetri
- Fatjon Marku
- Anton Marku alias Anton Tamure
- Florjan Vuka alias Vathaj
- Kristjan Lleshi
- Klevi Leka
- Lulzim Pepa
- Anton Kola
- Ilir Lazri
Jetmir Pepa është gjithashtu i njohur për policinë, pasi në janar 2025 u shpall në kërkim pas një incidenti me armë në një koncert në Parkun Olimpik të Tiranës.
Hetimet e SPAK
Hetimet kanë dokumentuar 8 episode kryesore trafiku kokaine, ku janë kapur dhe sekuestruar sasi të mëdha droge që arrijnë në mijëra kilogramë, të fshehura në ngarkesa me banane, peshk ton, lëngje frutash dhe mallra të tjera tregtare.
Në disa raste, sasi të mëdha janë kapur në Holandë, Peru dhe Ekuador, ndërsa rrjetet dyshohet se kishin lidhje të fuqishme ndërkombëtare.
Pasuritë e sekuestruara
GJKKO ka vendosur gjithashtu sekuestrimin preventiv të 232 pasurive të luajtshme dhe të paluajtshme, me një vlerë të përgjithshme rreth 12 milionë euro.
Hetimet për këtë grup vijojnë, ndërsa pritet të ketë zhvillime të mëtejshme në ditët në vijim.