Në një atmosferë të ngrohtë dhe plot emocione, Mira Kazhani prezantoi të premten librin e saj të ri, “Një ditë tjetër”, e rrethuar nga miq, kolegë gazetarë, botuesi Enver Robelli dhe figura të njohura të jetës publike dhe politike.
Libri është një rrëfim personal dhe i ndjerë për atë që autorja e quan “dimrin” më të vështirë të jetës së saj: betejën me një tumor dhe sfidat që solli kjo sëmundje. Përmes faqeve të tij, Kazhani ndan ndjesitë, frikën, shpresën dhe forcën që e shoqëruan gjatë këtij rrugëtimi sfidues.
Zgjedhja për ta promovuar librin në tetor, muaji ndërkombëtar i ndërgjegjësimit për kancerin e gjirit, nuk ishte rastësore. Në fjalën e saj, Mira bëri apel për kujdes ndaj shëndetit, veçanërisht tek gratë dhe vajzat, duke theksuar rëndësinë e kontrollit dhe parandalimit.
“Ky libër nuk është vetëm për ata që kanë kaluar atë që kam kaluar unë. Është për këdo që përballet me sfidat e jetës, me dhimbjen dhe frikën, por edhe me forcën për të rifilluar nga e para,” u shpreh autorja.
Kazhani falënderoi familjen, miqtë, mjekët dhe botuesin që i dhanë jetë këtij libri, duke ndarë mirënjohje për çdo mbështetje dhe fjalë inkurajuese gjatë gjithë kësaj periudhe. Promovimi u mbyll me përqafime, fotografi dhe një gotë verë, duke krijuar një moment të ngrohtë bashkëpunimi dhe solidariteti.
