Pas zbardhjes së vendimit të Komisionit të Venecias për mandatin e Olta Xhaçkës, përplasjes mes opozitarëve dhe mazhorancës kanë qenë të shumta.
Reagimet u pasuan që ditën e djeshme nga demokratët Bardhi dhe Bylykbashi të cilët i bënë thirrje Spiropali që ta rilexojë vendimin, pasi kjo e fundit u shpreh se me këtë vendim morën përgjigje të gjitha shpifjet ndaj socialistëve.
Ndërkohë ditën e sotme gjatë konferencës së Kryetarëve ka qenë demokratja Ina Zhupa ajo që ka reaguar e irrituar ndaj Spiropalit.
Deputetja e PD është shprehur se Komisioni i Venecias konfirmon drejtësinë e betejës së opozitës dhe nuk i jep të drejtë mazhorancës.
“Kjo konferencë kryetaresh duhet kishte pikë të parë ndjesën tuaj për vërdallisjen dy vjeçare për të mbrojtur Edi Ramën me mandatin e Olta Xhaçkës. Qartësisht Komisioni i Venecias konfirmon drejtësinë e betejës së opozitës, duke thënë atë që çdo jurist e dinte, që zbatimi i vendimeve të GJK është i panegociushëm dhe nuk mund të varet nga vullneti politik i një mazhorance.
Znj. Spiropali investove komisionin e Venecias qe më pas mos ta zbatoje atë që thotë Komisioni Venecias, edhe flisje sikur kishe lexuar gjuhë marsiane. Me logjikën tuaj Ju jeni mbi Kushtetutën, me logjikën tuaj Deputeti është mbi kushtetutën dhe vendimet e gjykatës kushtetuese dhe jo e kundërta. Me këtë puç kushtetues ju jepni fund shtetit të së drejtës dhe legjitimoni që jemi në diktaturë”, u shpreh ajo.
Zhupa më tej kërkoi në emër të grupit: Mos mbani peng Kuvendin për interesa klienteliste, të fusni të enjten për votim raportin dhe ta dërgoni menjëherë po nesër në Gjykatën Kushtetuese.