Enea Thomaraj, 29 vjeçari nga Elbasani, ndërrou jetë më 4 tetor, 3 muaj pasi ishte intubuar. I riu mbeti i plagosur pasi i ra në kokë dera e banesës së tij, e ‘shkundur’ nga një sasi tritoli që u vendos në katin e fqinjave të tij, ku jetonin motrat Gjovana dhe Alda Nikolli, por nuk kishte asnjë lidhje me to.
Ora News ka siguruar pamjet e personit që dyshohet se vendosi lëndën plasëse. Siç shihet, ai mban një kapele në kokë, veshur ka një bluzë të bardhë dhe kur ka shkuar për të vendosur tritolin dhe kur është larguar, lëviz me një biçikletë.
Pamjet i ka në dorë dhe Prokuroria e Posaçme, e cila ka tërhequr dosjen nga Elbasani. Ky person është kapur nga kamerat fillimisht rreth orës 02:00 të 13 korrikut 2024, teksa lëviz në një nga rrugët e qytetit të Elbasanit.
Më tej, silueta e tij shfaqet në orën 02:28 minuta, shumë pranë hyrjes së pallatit ku banonin me qira dy motrat nga Lezha, Alda Nikolli dhe Gjovana Nikolli.
Ai ka lënë poshtë pallatit biçikletën dhe me shpejtësi ka shkuar në katin e 4, duke vendosur tritolin në derën e apartamentit ku jetonin dy motrat. Sipas burimeve të prokurorisë, mekanizmi shpërthyes i tritolit ka qenë me fitil, raporton gazetari Elton Qyno.
Pas aktivizimit të fitilit me zjarr, personi largohet me shpejtësi përmes shkallëve dhe teksa merr biçikletën poshtë pallatit, ikën nga zona në drejtim të spitalit të Elbasanit. Për herë të fundit imazhi i tij shihet në orën 05:35 të mëngjesit të 13 korrikut, sërish i hipur mbi biçikletë.
Dy motrat të cilat janë shumë të njohura në rrjetet sociale, ishin përfshirë në një konflikt me Nuredin Dumanin dhe kanë akuzuar publikisht këtë të fundit se kishte porositur sulmin me tritol në shtëpinë e tyre.
Enea Thomaraj po shkonte nga dhoma e gjumit për në tualet kur ndodhi shpërthimi me tritol dhe nga plasja e fortë, dera e shtëpisë së tij u shkatërrua dhe i ra në kokë. Fatkeqësisht, pas tre muajsh në intubim, ai nuk ja ka dalë dot.
29 vjeçari jetonte me dy prindërit e sëmurë dhe me vëllain e tij, gjithashtu i sëmurë. Ai ishte i vetmi që punonte në familje dhe njihej në qytet si një djalë i qetë. Fqinjët janë shokuar dje, kur kanë marrë vesh lajmin se Enea kishte mbyllur sytë përgjithmonë.