Gjykata e Apelit në Tiranë ka lënë në burg një shtetase turke, e akuzuar për ushtrim të paligjshëm të prostitucionit. E reja, e cila kishte hyrë në Shqipëri me idenë se mund të gjente punë fitimprurëse, rezulton se ishte përfshirë në një rrjet të organizuar prostitucioni, me kontakte të drejtpërdrejta përmes aplikacioneve të komunikimit.
Sipas dosjes hetimore të siguruar nga gazetarja Anila Hoxha, vajza ka deklaruar se ishte joshur nga një mike për të ardhur në Shqipëri, e bindur se mund të siguronte të ardhura të konsiderueshme. Në Tiranë u prit nga një shtetas turk, Sinan Borat, ish-parukier në zonën e Astirit, që tashmë punonte si taksist “privat” për eskortat.
“Më tha se në Tiranë fitohet shumë. Më prezantoi me një mik të tij që do më ndihmonte për strehim e gjithçka tjetër,” – deklaron vajza në dëshminë para hetuesve.
Skema e funksionimit ishte e thjeshtë, por e mirëorganizuar: përmes një grupi në WhatsApp të quajtur “Isil”, menaxhohej gjithë aktiviteti. Në grup ndodheshin tre persona – vajza si punonjëse, një tjetër me pseudonimin Cansu që shërbente si operatore, dhe Hakan, i cilësuar si menaxheri i rrjetit dhe ndërmjetësi me klientët.
Pagesat për shërbimin shkonin nga 150 deri në 200 euro për 30 minuta, ndërsa fitimi ndahej përgjysmë mes vajzës dhe Hakanit, i cili operonte nga Turqia. Qiranë e apartamentit e ndanin po ashtu mes tyre, dhe pasi grumbulloheshin para të mjaftueshme, një person i dërguar nga Hakan vinte t’i tërhiqte në dorë pranë banesës.
Në bisedat e përgjuara nga prokuroria, vajza ankohej gjatë muajit të Ramazanit për rënien e kërkesës nga klientët, çka ndikonte direkt në fitimet e saj.