Në krye të Teatrit të Operas dhe Balettit, TOB, nuk është më në detyrë drejtoresha Abigeila Voshtina.
Burimet kanë konfirmuar për Radar.al se Voshtina është shkarkuar nga detyra që mbante në krye të TOB, ditët e fundit.
Gjithçka ka ardhur sipas burimeve pas kontrolleve që ka ushtruar në këtë institucion Krimi Ekonomik dhe Kontrolli i Lartë i Shtetit.
Mësohet se KLSH ka gjetur parregullsi në financat e institucionit që ajo drejtonte, duke ngritur dyshime për abuzim financiar.
Pas kontrollit dhe raportit të KLSH-së, mësohet se rasti i abuzimit me financat e “Operas” është marrë në dorë nga Prokuroria e Posaçme, SPAK.
Voshtina, është njëkohësisht edhe e deleguara e Partisë Socialiste, në Njësinë nr:5, në kryeqytet.
Vendimi i qeverisë
Ka qenë zv.Kryeministrja Belinda Balluku, që drejtonte mbledhjen e Qeverisë e cila e ka firmosur sot shkarkimin nga detyra të Voshtina. Në vendim nuk jepen arsyet e shkarkimit.
“Në mbështetje të nenit 100 të Kushtetutës dhe të pikës 4, të nenit 9, të ligjit nr.10352, datë 18.11.2010, “Për artin dhe kulturën”, të ndryshuar, me propozimin e ministrit të Ekonomisë, Kulturës dhe Inovacionit, Këshilli i Ministrave
V E N D O S I:
Znj. Abigeila Voshtina, drejtor i Përgjithshëm i Teatrit Kombëtar të Operës, Baletit dhe Ansamblit Popullor, lirohet nga kjo detyrë.
Ngarkohet Ministria e Ekonomisë, Kulturës dhe Inovacionit për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare””, thuhet në vendim.
Gjyqi nga tenori Armaldo Kllogjeri
Kujtojmë që Voshtina ka qenë në krye të TOB që nga viti 2016.
Mandati i saj aktual ishte kontestuar nga shumë artistë, por kryeministri Edi Rama vendosi t’ia besonte edhe një mandat të tretë Voshtinës.
Abigeila Voshtina është akuzuar shpesh nga artistë të shumtë për emërime nepotike, shkeljet dhe abuzime financiare etj.
Një zë që e ka akuzuar është edhe ish banori i Big Brother Vip Albania Armaldo Kllogjeri i cili e ka hedhur në gjyq TOB, teksa zbuloi se Teatri i Operas dhe Baletit e hoqi nga puna pa mbaruar aventurën në BBVA.
“Po ja ku po ja u them sot: kam hedhur në gjyq Teatrin e Operas dhe Baletit i cili një muaj pa mbaruar Big-u më hoqi nga puna në mënyrë të rrufeshme, pa iu dridhur qerpikut fare, pa menduar që ky person ka kontribuar 20 vjet dhe teatri pa vënë llogjikën në punë më lë në rrugë me dy fëmijë, me nuse shtatzënë dhe një vajzë të mitur. Është e pabesueshme, por jua them që ta besoni. Megjithatë unë kam lënë drejtësinë e cila do të marrë vendimin e duhur për rastin tim”, thotë Armaldo në videon e publikuar në llogarinë e tij në “Instagram”.