Kryeministri Edi Rama ka reaguar nga Mali i Zi lidhur me debatin për investimin e parashikuar në Zvërnec, në një kohë kur përpara Kryeministrisë po zhvillohej një protestë kundër projektit.
Përmes një videoje të publikuar në rrjetet sociale nga kompleksi turistik Porto Montenegro, Rama tha se ndodhej rastësisht në një projekt që, sipas tij, fillimisht ishte menduar për Shqipërinë, por përfundoi duke u realizuar në vendin fqinj.
“LIVE NGA PERLA QË E SOLLËN KËTU DIKUSH QË E PËRZUNË NGA SHQIPËRIA”, shkroi kreu i qeverisë krahas videos.
Duke iu referuar mundësive të humbura për zhvillimin e turizmit dhe investimeve strategjike, Rama përdori një metaforë sportive për të krahasuar situatën me atë që ndodhi me projektin në Mal të Zi.
“O çuna goca, na e kaluan njëherë këta vëllezërit e vegjël topin për shalësh, për fajin e honxhobonxhove tanë që e lanë topin ta marrë deti”, u shpreh ai.
Kryeministri theksoi se Shqipëria nuk duhet të humbasë më mundësi të ngjashme zhvillimi, duke shtuar se kundërshtimet ndaj investimeve të mëdha nuk duhet të pengojnë realizimin e projekteve strategjike.
“Po tani s’bëhet llaf më, ta harrojnë të gjithë ata që thonë s’duan apo s’na duan, se na kalon prap huq topi i historisë së Shqipërisë së Re Europiane”, deklaroi Rama.
Reagimi i tij vjen në një moment kur projekti i investimit në Zvërnec ka nxitur debate dhe kundërshti nga grupe ambientalistësh dhe qytetarësh, ndërsa qeveria e konsideron atë një mundësi të rëndësishme për zhvillimin ekonomik, rritjen e punësimit dhe transformimin e ofertës turistike të vendit.