Një skemë e re financimi pritet të vihet së shpejti në dispozicion të të rinjve shqiptarë përmes Agjencia Kombëtare e Rinisë, duke ofruar grante deri në 10 mijë euro për mbështetjen e projekteve me ndikim në komunitet.
Sipas nismës së re të parashikuar në Ligjin për Rininë, një nga risitë kryesore është njohja dhe mbështetja e grupeve joformale rinore. Kjo u jep të rinjve mundësinë të organizohen në grup, të regjistrohen pranë noterit si strukturë joformale dhe të aplikojnë për financim për idetë e tyre.
Drejtoresha e Agjencisë Kombëtare të Rinisë, Sara Bodo, tha se kjo skemë synon të fuqizojë të rinjtë dhe t’u krijojë hapësira konkrete për të kthyer idetë në projekte reale në shërbim të komunitetit.
“Kjo është një mundësi reale për të rinjtë që duan të sjellin ndryshim në komunitetet e tyre. Ne duam t’i mbështesim ata jo vetëm me financim, por edhe duke krijuar hapësira më të mëdha për pjesëmarrje dhe angazhim qytetar”, u shpreh Bodo.
Financimet synojnë të nxisin pjesëmarrjen aktive të të rinjve në jetën shoqërore, kulturore dhe komunitare, duke i mbështetur ata në realizimin e projekteve që sjellin zhvillim dhe përmirësim të jetës në zonat ku jetojnë.