Gazetarja e njohur Mira Kazhani ka ndarë me ndjekësit lajmin e trishtë të ndarjes nga jeta të babait të saj, Petrit Kazhani.
Përmes një postimi prekës në Instagram, ajo publikoi një fotografi të të atit, të shoqëruar me fjalët: “Sot një pjesë e shpirtit tim mbylli sytë përgjithmonë. Babi im”, duke shprehur dhimbjen e thellë për humbjen e tij.
Në të njëjtin rrjet social, Kazhani ka bërë të ditur edhe detajet e ceremonisë mortore, duke ftuar miqtë dhe të afërmit të japin lamtumirën e fundit.
Petrit Kazhani vuante prej vitesh nga demenca, një sëmundje për të cilën Mira Kazhani ka folur edhe më herët, përfshirë në librin e saj autobiografik “Një ditë tjetër”. Në këtë libër, ajo rrëfen hapur jo vetëm përballjen e familjes me sëmundjen e të atit, por edhe betejën e saj personale me kancerin e gjirit.
Lajmi ka prekur ndjekësit dhe kolegët e saj, të cilët kanë shprehur ngushëllime dhe mbështetje për gazetaren e njohur në këtë moment të vështirë.