Avokati dhe ish-ministri i Drejtësisë, Ylli Manjani, ka reaguar pas vendimit të Gjykatës Kushtetuese, e cila pezulloi efektet e vendimeve të GJKKO që e larguan nga detyra zv.kryeministren Belinda Balluku.
Manjani e cilëson këtë zhvillim si një frenim të “puçit kushtetues” ndaj qeverisë, për të cilin mban përgjegjëse një trupë gjyqtari dhe prokurori. Sipas tij, ndërhyrja e Kushtetueses ishte e domosdoshme për të rikthyer ekuilibrat mes pushteteve.
Ai thekson se çështja nuk ka lidhje me fatin politik të Belinda Ballukut apo me vendimet politike të kryeministrit Edi Rama, të cilat i konsideron një debat më vete. Po ashtu, Manjani nënvizon se hetimet dhe veprimet mbrojtëse të Ballukut mbeten një proces normal juridik, i pavarur nga vendimi i sotëm.
Postimi i Manjanit
Më vjen mirë që Gjykata Kushtetuese ka ndaluar efektet e Puçit Kushtetues të një gjykatësi dhe një prokurori ndaj qeverisë.
Tani duhet që kjo Gjykatë të ndalojë njëherë e mirë këtë preçedent të shëmtuar.
Duhet të presim deri në fund, por rivendosja e normalitetit juridik ndërmjet pushteteve të ndara ishte domosdoshmëri.
*Kjo nuk ka lidhje fare me fatin politik të zonjës Balluku, apo me qëndrimet e vendimet politike të Edi Ramës. Ky ka qenë e mbetet debat tjetër që nuk ka lidhje me puçin kushtetues, që erdhi nga zbatimi abuziv i një neni procedural penal.
*Gjithashtu nuk ka lidhje as me ankimet dhe veprimet mbrojtëse që zonja Balluku do të duhet të bëjë normalisht si çdo qytetar tjetër që gjendet nën akuzë apo hetim nga drejtësia.