Kreu i shtetit dhe i partisë në Kinë, Xi, dhe presidenti i Rusisë, Putin, demonstruan unitet në Pekin – por për një tubacion gazi të planifikuar nuk u arrit marrëveshje konkrete.
Pak ditë pas vizitës së presidentit të SHBA-së, Donald Trump, udhëheqësi i shtetit dhe i partisë në Kinë, Xi Jinping, dhe presidenti i Rusisë, Vladimir Putin, theksuan në Pekin miqësinë dhe bashkëpunimin e ngushtë dhe arritën shumë marrëveshje në fushat e tregtisë dhe energjisë. Sipas agjencisë kineze të lajmeve Xinhua, Xi tha gjatë takimit me Putinin në Sallën e Madhe të Popullit se Kinadhe Rusia kanë arritur ta thellojnë gjithnjë e më shumë bashkëpunimin strategjik. Ai paralajmëroi njëkohësisht për “kundërrryma të njëanshme dhe hegjemoniste që po përhapen” – një aludim i qartë ndaj Shteteve të Bashkuara.
Bashkëpunimi në fushën e energjetikës në fokus
Putin tha se forca shtytëse e bashkëpunimit ekonomik është bashkëpunimi ruso-kinez në sektorin e energjisë. “Në mes të krizës në Lindjen e Mesme, Rusia vazhdon të mbajë rolin e saj si furnizuese e besueshme të lëndëve të para, ndërsa Kina mbetet një konsumatore e përgjegjshme e këtyre burimeve”, shtoi kreu i Kremlinit – edhe këtu një aludim ndaj luftës së SHBA-së dhe Izraelit kundër Iranit dhe bllokadës de-facto të Ngushticës së Hormuzit, e rëndësishme për tregtinë e naftës.
Sipas mediave shtetërore kineze, Xi theksoi nevojën për një “ndalim të plotë të armiqësive” në Lindjen e Mesme. Një përfundim i shpejtë i konfliktit do të ndihmonte në uljen e ndërprerjeve të stabilitetit të furnizimit me energji, të funksionimit të pandërprerë të zinxhirëve industrialë të furnizimit dhe të rendit tregtar ndërkombëtar.