Vetëm gjashtë muaj pas humbjes së djalit të parë, familja Mekolli është përballur me një tjetër tragjedi të rëndë. Enea Mekolli, efektiv i forcave “Shqiponja”, mbeti i vrarë gjatë operacionit policor të zhvilluar më 4 qershor në fshatin Lozhan.
Familja Mekolli kishte humbur edhe djalin tjetër vetëm gjashtë muaj më parë, pas një sëmundjeje të rëndë.
Gazetari i Vizion Plus, Tonin Frroku, bëri të ditur se gjatë muajve të fundit janë organizuar katër operacione nga Drejtoria Vendore e Policisë Korçë, me mbështetjen e forcave speciale dhe RENEA-s, për kapjen e Violand Braçellarit. Megjithatë, i dyshuari kishte arritur t’u shmangej aksioneve policore, duke u larguar pak para mbërritjes së efektivëve.
Ndërkohë, efektivi i plagosur gjatë operacionit, Edison Adri, ndodhet në gjendje stabël dhe pritet t’i nënshtrohet një tjetër ndërhyrjeje kirurgjikale.
Homazhet në nder të Enea Mekollit do të zhvillohen nga ora 10:00 deri në 12:00, ndërsa ceremonia mortore do të mbahet në orën 14:00.
Ai do të prehet në vendin e lindjes. Edhe pse u shpall “Dëshmor Atdheu” dhe protokolli parashikon që të prehet në varrezat në Tiranë, ishte dëshira e familjes që djali i tyre të varrosej pranë vëllait.