Një video e krijuar me inteligjencë artificiale dhe e publikuar nga ministrja izraelite e Inovacionit, Gila Gamliel, ka ngjallur reagime të forta në rrjet. “Ja si do të jetë Gaza në të ardhmen. Ose ne, ose ata”, shkruan ministrja në përshkrimin e postimit të saj, i cili po qarkullon gjerësisht online dhe po cilësohet nga shumëkush si provokues dhe shqetësues.
Në videon e animuar, Gaza paraqitet jo si një territor i rrënuar nga lufta, por si një metropol futurist: me resorte luksoze, ndërtesa të larta, plazhe private dhe jetë të gjallë nate. Në sfond dallohet një kullë me emrin e Donald Trump, ndërsa në skenat e tjera shfaqen vetë Trump dhe kryeministri izraelit Benjamin Netanyahu, të shoqëruar nga bashkëshortja e Trumpit, Melania. Ata ecin të buzëqeshur përgjatë një lungomareje, teksa në qiell shpërthejnë fishekzjarrë.
Në një koment të mëvonshëm, Gamliel shkruan: “Largimi vullnetar i banorëve të Gazës mund të ndodhë vetëm me Netanyahun dhe Trumpin”, deklaratë që u cilësua nga shumë përdorues në rrjet si nxitëse e një narrative për spastrim etnik.
Publikimi i kësaj videoje vjen në një kohë kur mbi 2.3 milionë banorë të Gazës përballen me krizë të thellë humanitare. Organizatat ndërkombëtare paralajmërojnë për mungesë ekstreme të ushqimit, ndërsa raportet nga terreni flasin për njerëz që rrinë në radhë për orë të tëra për pak ushqim apo ujë të pijshëm.
Pamjet e publikuara nga mediat ndërkombëtare tregojnë për fëmijë, të moshuar dhe të sëmurë që vuajnë urinë, ndërsa mjekët në Gaza e përshkruajnë situatën si një betejë të përditshme, jo vetëm kundër pasojave të luftës, por edhe kundër urisë që po kërcënon mbijetesën e banorëve.
חשיפה : כך עזה תראה בעתיד.
הגירת עזתים מרצון רק עם טראמפ ונתניהו.זה אנחנו או – הם !
לינק לתוכנית ההגירה מרצון מעזה שהגשתי לקבינט בשבוע הראשון למלחמת 'חרבות ברזל' 13.10.23 בתגובה הראשונה. pic.twitter.com/kdPXcONmQl
— גילה גמליאל – Gila Gamliel (@GilaGamliel) July 22, 2025