IZRAEL– Janë gjetur trupat e pajetë të 6 pengjeve të mbajtura nga Hamasi në Rripin e Gazës. Lajmi është bërë i ditur nga Forcat e Mbrojtjes të Izraelit (IDF) ku ndër të tjera thanë se trupat u gjetën të shtunën në një tunel nëntokësor në zonën e Rafah.
IDF i identifikoi pengjet si Carmel Gat, Eden Yerushalmi, Hersh Goldberg-Polin, Alexander Lobanov, Almog Sarusi dhe Master Sgt Ori Danino. Zëdhënësi i IDF, Admin Daniel Hagari tha se një vlerësim fillestar ishte se ata ishin “vrarë brutalisht nga terroristët e Hamasit pak para se t’i arrinim ata”.
Pasi u konfirmua vdekja e Goldberg-Polin, një qytetar amerikan, presidenti amerikan Joe Biden tha se ishte “i shkatërruar dhe i zemëruar” nga lajmi, shkrujnë mediat e huaja.
Gjatë deklaratës së tij mëngjesin e kësaj të diele, IDF tha se trupat ishin “rikthyer në territorin izraelit”. Në deklaratë shtohet se familjet e tyre tashmë janë njoftuar. Nga ana tjetër presidenti Biden tha në një deklaratë se “Hersh ishte në mesin e të pafajshmëve të sulmuar brutalisht ndërsa merrte pjesë në një festival muzikor për paqen në Izrael më 7 tetor”.
“Ai humbi krahun duke ndihmuar miqtë dhe të huajt gjatë masakrës së egër të Hamasit. Sapo kishte mbushur 23 vjeç. Ai planifikoi të udhëtonte nëpër botë. Unë kam njohur prindërit e tij, Jon dhe Rachel. Ata kanë qenë të guximshëm, të mençur dhe të palëkundur, edhe pse kanë duruar të paimagjinueshmen.”- tha zoti Biden.
Ushtria izraelite nisi një fushatë në Gaza për të shkatërruar Hamasin në përgjigje të sulmit të paprecedentë në Izraelin jugor më 7 tetor, gjatë të cilit u vranë rreth 1200 njerëz dhe 251 të tjerë u morën peng. Më shumë se 40,530 njerëz janë vrarë në Gaza që atëherë, sipas ministrisë së shëndetësisë të territorit të Hamasit. Ndërmjetësuesit e SHBA-së, Egjiptit dhe Katarit po përpiqen të ndërmjetësojnë një marrëveshje armëpushimi që do ta bënte Hamasin të lironte 97 pengjet që ende mbahen, duke përfshirë të paktën 27 të cilët supozohen të vdekur, në këmbim të të burgosurve palestinezë në burgjet izraelite./bbc