Presidenti i SHBA-së, Donald Trump, ka deklaruar se ka zhvilluar biseda pozitive me presidentin rus Vladimir Putin dhe atë ukrainas Volodymyr Zelensky, në kuadër të përpjekjeve për t’i dhënë fund luftës në Ukrainë.
Në një intervistë për Fox News, Trump u shpreh se po punohet për të arritur një zgjidhje të konfliktit, duke theksuar se ka pasur komunikime të drejtpërdrejta me të dy liderët, por pa dhënë detaje mbi kohën e zhvillimit të tyre.
Ai kritikoi gjithashtu tensionet mes dy presidentëve, duke e cilësuar “të tepruar” armiqësinë mes tyre dhe duke shtuar se një klimë e tillë e vështirëson arritjen e një marrëveshjeje.
Trump ka premtuar më herët se do t’i japë fund luftës që nisi me pushtimin rus të Ukrainës në shkurt të vitit 2022, megjithatë konflikti vijon ende, pavarësisht përpjekjeve diplomatike.