Presidenti i Shteteve të Bashkuara, Donald Trump, deklaroi të enjten se SHBA-të mund të ndërmarrin veprime për të marrë nën kontroll ishullin Kharg dhe objekte të tjera strategjike të naftës në Iran.
Ishulli Kharg, i vendosur në Gjirin Persik, konsiderohet jetik për ekonominë iraniane, pasi përmes tij përpunohet rreth 90 për qind e eksporteve të naftës së papërpunuar të vendit.
Trump paralajmëroi gjithashtu për një përshkallëzim të mundshëm ushtarak, duke deklaruar se Irani do të përballet me goditje të forta gjatë natës, në një kohë kur tensionet mes dy vendeve vazhdojnë të rriten dhe përpjekjet diplomatike për arritjen e një marrëveshjeje kanë mbetur në vendnumëro.
Gjatë natës, SHBA-të dhe Irani kanë shkëmbyer sulme ajrore, ndërsa presidenti amerikan kishte paralajmëruar më herët se operacionet ushtarake do të vijonin nëse nuk do të arrihej një memorandum mirëkuptimi mes palëve.
Sipas ekspertëve të sigurisë, çdo përpjekje për të pushtuar ose për të vendosur kontroll mbi ishullin Kharg do të kërkonte angazhimin e një numri të madh trupash tokësore, një opsion që administrata Trump deri tani ka treguar hezitim ta përdorë.
Ndërkohë, ushtria amerikane ka realizuar disa sulme ajrore ndaj objektivave ushtarake në ishull, por ka shmangur goditjen e infrastrukturës kryesore energjetike, duke synuar të mos dëmtojë kapacitetet strategjike të eksportit të naftës.