Presidenti i SHBA-së, Donald Trump, ka njoftuar zgjatjen me 10 ditë të pezullimit të sulmeve ndaj centraleve energjetike iraniane, pas një kërkese të qeverisë së Iranit.
Njoftimi u bë përmes një postimi në Truth Social, ku Trump theksoi se vendimi vjen në kuadër të bisedimeve që vazhdojnë mes Shteteve të Bashkuara dhe Teheranit, të cilat, sipas tij, po ecin mirë.
“Sipas kërkesës së qeverisë iraniane, kjo deklaratë shërben për të njoftuar se po zgjas periudhën e pezullimit të goditjeve ndaj termocentraleve me 10 ditë, deri të hënën, më 6 prill 2026, në orën 20:00, sipas orës Lindore. Bisedimet janë duke vazhduar dhe, pavarësisht deklaratave të gabuara nga mediat e lajmeve të rreme dhe të tjerë, ato po shkojnë shumë mirë. Faleminderit për vëmendjen tuaj ndaj kësaj çështjeje”, shkruan Trump.
Ky vendim tregon një qasje më të moderuar të administratës amerikane ndaj tensioneve me Iranin, ndërsa bisedimet diplomatike për të shmangur përshkallëzime në rajon vazhdojnë.