Presidenti i Shteteve të Bashkuara, Donald Trump, ka komentuar sërish zhvillimet e fundit në Lindjen e Mesme, duke folur për situatën e tensionuar mes SHBA-së dhe Iranit gjatë një deklarate për mediat amerikane.
Duke iu referuar veprimeve ushtarake, Trump tha për “Fox News” se Shtetet e Bashkuara kanë kryer sulme ajrore me një kosto të konsiderueshme, duke deklaruar se “janë përdorur bomba me vlerë rreth 250 milion dollarë” ndaj objektivave në Iran.
Ai gjithashtu riktheu në vëmendje çështjen e Ishullit Kharg, një pikë strategjike në Gjirin Persik, duke lënë të hapur mundësinë e interesit amerikan për kontrollin e tij, por njëkohësisht shprehu dyshime mbi gatishmërinë e vendit për një veprim të tillë.
“Nuk jam i sigurt nëse vendi ka oreks për këtë, sado e mirë të duket,” u shpreh Trump, duke nënvizuar një qëndrim më të rezervuar për një ndërhyrje të mundshme më të thellë.
Deklaratat vijnë në një moment tensioni të lartë në rajon, teksa SHBA dhe Irani vijojnë shkëmbimet e sulmeve dhe retorikës së ashpër, mes frikës për një përshkallëzim të mëtejshëm të konfliktit.