Një operacion i gjerë sigurie është ndërmarrë në Pentagon, pasi sistemet e brendshme të monitorimit të cilësisë së ajrit kanë sinjalizuar një problem të mundshëm të lidhur me praninë e substancave të rrezikshme në ambientet e ndërtesës.
Si masë paraprake, disa kate dhe korridore janë mbyllur plotësisht, ndërsa pjesë të tjera janë evakuuar menjëherë për të garantuar sigurinë e personelit. Në zonat e prekura është dhënë edhe urdhri “shelter-in-place”, duke u kërkuar personave të qëndrojnë brenda deri në njoftim të mëtejshëm.
Zyrtarët e Pentagonit kanë deklaruar se masat janë marrë ekskluzivisht për arsye sigurie, ndërsa ende nuk është përcaktuar shkaku i alarmit. Deri më tani nuk dihet nëse bëhet fjalë për rrjedhje kimike, gaz apo ndonjë substancë tjetër të rrezikshme.
Në vendngjarje janë angazhuar ekipe të specializuara për trajtimin e materialeve të rrezikshme, si nga vetë struktura e Pentagonit, ashtu edhe nga Departamenti i Zjarrfikësve të Qarkut Arlington, të cilët po punojnë për identifikimin e burimit të sinjalit dhe për sigurinë e zonës.
Autoritetet kanë konfirmuar se deri në këtë fazë nuk raportohet për persona të lënduar dhe se nuk është identifikuar ndonjë substancë konkrete e rrezikshme. Hetimet dhe kontrollet teknike vijojnë, ndërsa situata mbetet nën monitorim të vazhdueshëm.