Një çift britanik është arrestuar në Spanjë, pasi dyshohet se ka lënë vetëm tre fëmijët e tyre të mitur në një hotel në Costa del Sol, për të dalë për të festuar, raportojnë mediat lokale.
Sipas hetimeve paraprake, fëmijët e moshës 4 vjeç, 2 vjeç dhe një foshnjë 6-muajshe janë gjetur pa mbikëqyrje në dhomën e hotelit, e cila ishte në gjendje të rrëmujshme. Dyshohet se fëmija më i madh ishte detyruar të kujdesej për dy më të vegjlit në mungesë të prindërve.
Ngjarja mori përmasa edhe më të rënda pasi foshnja 6-muajshe rezultoi pozitive për kokainë gjatë kontrollit mjekësor, duke ngritur alarm tek autoritetet spanjolle dhe duke nxitur ndërhyrjen e menjëhershme të policisë.
Fëmijët janë marrë nën kujdesin e përkohshëm të shërbimeve sociale në Andaluzia dhe janë dërguar për kontrolle në Spitalin “Materno Infantil” të Malagës, ku po mbahen nën monitorim mjekësor.
Policia Kombëtare e Spanjës ka konfirmuar arrestimin e çiftit, një burrë 41-vjeç dhe një grua 28-vjeçe, të cilët po hetohen për dyshime mbi braktisje të të miturve. Njësia e specializuar për çështjet familjare (UFAM) është përfshirë në hetim, ndërsa autoritetet lokale kanë marrë përkohësisht kujdestarinë e fëmijëve.
Autoritetet po vijojnë hetimet për të zbardhur plotësisht rrethanat e ngjarjes, e cila ka shkaktuar reagime të forta në opinionin publik në Spanjë dhe më gjerë.