Një ngjarje tragjike ka tronditur Holandën, ku tre persona, mes tyre dy fëmijë, humbën jetën pasi një automjet përplasi një grup nxënësish që po merrnin pjesë në një ekskursion me biçikleta.
Aksidenti ndodhi rreth mesditës pranë zonës së Vogelwaarde, në provincën Zeeland. Sipas autoriteteve, automjeti u përplas me një grup prej 14 fëmijësh dhe dy të rriturish që i shoqëronin gjatë aktivitetit.
Për pasojë, dy fëmijë dhe një i rritur humbën jetën në vendngjarje, ndërsa katër fëmijë të tjerë pësuan lëndime të rënda dhe u transportuan me urgjencë në spital për trajtim mjekësor.
Shërbimet e emergjencës mbërritën menjëherë në vendin e ngjarjes, ndërsa policia ka nisur hetimet për të zbardhur rrethanat dhe shkaqet që çuan në këtë aksident të rëndë.
Ngjarja ka shkaktuar tronditje të madhe në komunitetin lokal, ndërsa autoritetet vijojnë punën për identifikimin e plotë të viktimave dhe sqarimin e dinamikës së aksidentit.