Pas përplasjeve mes banorëve dhe autoriteteve gjatë aksionit për shembjen e ndërtimeve pa leje në Theth, Kisha Katolike ka reaguar përmes një deklarate të Arqipeshkvisë Metropolitane Shkodër-Pult.
Në deklaratën zyrtare, e firmosur nga Arqipeshkvi Xhovani Peraxhine, shprehet shqetësimi për situatën e tensionuar në zonën malore, ku një incident me molotov ndaj një ure druri ka ngritur alarmin për përshkallëzimin e dhunës.
“Si Kishë Katolike jemi dhe do të jemi gjithmonë në anën e paqes dhe të arsyes,” thuhet në reagim. “U bëjmë thirrje të gjithëve të ruajnë qetësinë, të angazhohen për dialog dhe të respektojnë jetën.”
Kisha dënon ashpër çdo formë dhune, nga çdo palë që të vijë, dhe bën thirrje për respektim të ligjit dhe drejtësisë si themel i bashkëjetesës qytetare. Në të njëjtën kohë, theksohet rëndësia e mbrojtjes së mjedisit si një “dhuratë e çmuar nga Zoti”, por pa harruar edhe nevojën për të mbështetur ata që punojnë me ndershmëri për të ndërtuar të ardhmen.
“Lutemi që kjo situatë të marrë zgjidhje sa më të shpejtë”, përfundon deklarata, duke i ftuar të gjitha palët të zgjedhin rrugën e arsyes dhe dialogut.