Dy tërmete të fuqishme kanë goditur veriun e Venezuelës brenda një intervali të shkurtër kohor, duke shkaktuar pasoja të rënda në njerëz dhe infrastrukturë.
Sipas Shërbimit Gjeologjik të Shteteve të Bashkuara (USGS), lëkundja e parë ka pasur magnitudë 7.2 pranë qytetit Morón, ndërsa e dyta 7.5 pranë San Felipe, me epiqendra rreth 300 kilometra larg kryeqytetit Caracas.
Autoritetet raportojnë një bilanc paraprak tragjik me mbi 920 të vdekur, mijëra të plagosur dhe një numër të konsiderueshëm personash të zhdukur, i cili mbetet ende i paqartë për shkak të vështirësive në komunikim dhe identifikim në zonat e prekura.
Sipas të dhënave të Kombeve të Bashkuara, katastrofa ka prekur miliona banorë, ndërsa sistemi shëndetësor në disa rajone është në kolaps, me mbi 20 spitale të dëmtuara dhe mungesë të pajisjeve bazë mjekësore.
Autoritetet vendase kanë vendosur masa emergjente, përfshirë dislokimin e forcave ushtarake në zonat më të goditura, për të garantuar rendin dhe për të parandaluar incidentet e mundshme të plaçkitjeve.
Ndërkohë, komuniteti ndërkombëtar është mobilizuar për ndihmë humanitare, me ekipe shpëtimi dhe ndihma që kanë mbërritur nga disa vende, përfshirë Shtetet e Bashkuara, Bashkimin Evropian dhe shtete të Amerikës Latine.
Operacionet e kërkim-shpëtimit vijojnë, ndërsa autoritetet paralajmërojnë se bilanci i viktimave mund të ndryshojë në ditët në vijim për shkak të situatës së paqëndrueshme në terren.