Një tërmet me magnitudë 7.4 ballë të shkallës Rihter ka tronditur sot brigjet lindore të Gadishullit Kamçatka në Lindjen e Largët të Rusisë, duke detyruar Qendrën e Paralajmërimit për Cunami në Paqësor të lëshojë një alarm urgjent.
Sipas Shërbimit Gjeologjik të SHBA (USGS), tërmeti ndodhi 111 kilometra në lindje të qytetit Petropavlovsk-Kamçatsky, në një thellësi prej 39.5 kilometrash.
Ngjarja rikthen frikën e korrikut të këtij viti, kur një tërmet gjigant në të njëjtin rajon shkaktoi valë cunami deri në 4 metra dhe evakuime masive nga Hawaii deri në Japoni.
Deri tani nuk raportohet për viktima apo dëme të konsiderueshme, por autoritetet u kanë kërkuar banorëve të zonave bregdetare të largohen drejt vendeve më të larta.
Qendra e Paralajmërimit për Cunami paralajmëron se valët e mundshme mund të arrijnë brigjet e Alaskës, Japonisë dhe ishujve të Paqësorit brenda orëve në vijim.