Policia greke ka arrestuar shqiptarin Kastriot Cenko, 39 vjeç pasi ka pranuar para efektivëve që i mori jetën gruas së tij Alba Cenko një javë më parë e vetëm sot e zbuloi vetë krimin.
39-vjeçari shqiptar pas arrestimit ka rrëfyer para hetuesve grekë shkakun.
Sipas mediave greke, arsyeja ishte xhelozia. Autori ka thënë në polici se, sipas tij, gruaja e tradhtonte me shokun e tij të ngushtë.
Gjithçka ka ndodhur, sipas pretendimeve të 39-vjeçarit, kur gruaja mori një telefonatë nga shoku i tij dhe hyri në banjo për të folur. Burri e dëgjoi, u zemërua dhe vendosi ta vriste.
Sipas rrëfimit të tij, shqiptari mori një çekiç dhe e goditi gruan në kokë. Ajo humbi ndjenjat, e ndërsa më pas 39-vjeçari e mbyti me duar. Më pas, ia mbështolli trupin me çarçaf dhe e fshehu trupin në dhomën e tyre.
Krimi ndodhi në mbrëmje të enjten e kaluar. Gjatë asaj kohe, dy fëmijët e çiftit 9 dhe 12 vjeç ishin në gjumë.
EMRAT dhe FOTOT/ Ky është burri shqiptar që i mori jetën gruas së tij dhe e fshehu 1 javë rresht
Të nesërmën, pasi u zgjuan, fëmijët pyetën të atin se ku ishte nëna. Por ai u tha se kishte shkuar në punë. Ndërsa fëmijët u nisën për shkollë.
Kur përfunduan mësimin, 39-vjeçari i çoi fëmijët te vëllai i tij. Këto ditë ata qëndruan te xhaxhai.
Sot që u kthyen në banesë, babai vendosi të tregonte krimin dhe lajmëroi policinë duke u thënë se kishte vrarë gruan dhe trupin e saj prej 1 jave e mbante në banesë. Në apartament mbante erë të rëndë për shkak të dekompozimit të trupit.