Në dëshminë e tij para GJKKO-së më 17 qershor, bashkëpunëtori i drejtësisë Erion Alibej ka zbuluar detaje të reja tronditëse mbi aktivitetin kriminal të tij dhe të vëllait, Endrit Alibej. Ai pranoi përfshirjen në trafikun e drogës, duke pohuar se kishin bashkëpunuar me Dritan Gjikën për transportimin e 530 kg kokainë nga Ekuadori drejt portit të Mersinit në Turqi.
Sipas Alibejt, ngarkesa ishte rezultat i një investimi të madh financiar, por gjithçka ndryshoi kur dy bashkëpunëtorët kryesorë, vëllai i tij Endriti dhe një shtetas turk, u vranë. “Më vranë dy njerëzit kryesorë të kësaj ngarkese. Krahas humbjes së tyre, humba edhe financiarisht, deri për bukën e gojës”, deklaroi ai.
Alibej shtoi se për episodet e vrasjeve ka komunikuar përmes aplikacionit të koduar Sky Ecc, ndërsa mohoi përfshirjen direkte në vrasje. Në dëshminë e tij përmendi edhe emrin e Suel Çelës, për të cilin pretendon se ka pasur interes të eliminonte Endritin nga loja.
Ai akuzoi gjithashtu strukturat e Prokurorisë dhe Policisë së Elbasanit për korrupsion, duke deklaruar se zotëron prova për këtë.