Një studim amerikan ka arritur në përfundimin se prania e personave që shkaktojnë stres në jetën tuaj mund të lidhet me një plakje më të shpejtë biologjike.
Afërsia e detyruar, veçanërisht me familjarët, duket se e përforcon këtë efekt. Kolegët që nuk ndalen së treguari dramat e tyre, baballarët që kritikojnë vazhdimisht stilin tuaj të jetesës apo njerëzit që monopolizojnë bisedat mund të jenë më shumë se thjesht irritues – ata mund të ndikojnë drejtpërdrejt në ritmin e plakjes.
Sipas studiuesve, sa më shumë njerëz “bezdisës” të keni rreth vetes, aq më i madh është rreziku për plakje biologjike të përshpejtuar. Ndërveprimi i shpeshtë me këta individë duket se e përforcon edhe më shumë këtë efekt.
Përllogaritjet e studimit tregojnë se çdo individ i vështirë në rrethin shoqëror lidhet me rreth 1.5% plakje shtesë biologjike brenda një viti kalendarik.
Stresi i shkaktuar nga këto marrëdhënie ka efekte të ngjashme me stresin financiar ose atë të punës: rrit inflamacionin në trup, dobëson funksionin imunitar dhe shton rrezikun për sëmundje të ndryshme.
Studimi përfshiu 2.345 pjesëmarrës nga Indiana, të moshës 18 deri në 103 vjeç. Shkencëtarët analizuan ADN-në e tyre për shënjues të plakjes biologjike dhe i pyetën për marrëdhëniet e tyre shoqërore.
Rezultatet treguan se personat që kishin marrëdhënie të komplikuara ose që kishin përjetuar një fëmijëri të vështirë kishin më shumë gjasa të jetonin me individë stresues. Po ashtu, gratë raportuan më shpesh se burrat praninë e këtyre personave në rrethin e tyre shoqëror.