Gazetarja e Top Channel, Anila Hoxha, ka zbardhur detaje nga kallëzimi penal i një shtetasi A. K., si dhe nga hetimet që po kryhen nga Agjencia e Mbikëqyrjes Policore në lidhje me një operacion në zonën e Korçës.
Në denoncimin e bërë më 3 qershor 2026 në Komisariatin e Policisë Maliq, A. K. ka deklaruar se fillimisht është kontaktuar në Durrës nga një person i cili i ka ofruar punë në një stan në zonën e Maliqit, me një pagë më të lartë se zakonisht. Sipas tij, pas komunikimeve me një numër telefoni, ai është dërguar në një zonë malore dhe ka nisur punë si punëtor stalle.
Ai ka shpjeguar se në vendin ku qëndronte kishte shumë bagëti dhe jetonin vetëm personi që e kishte punësuar, i identifikuar si Violandi, dhe nëna e tij. Sipas kallëzimit, gjatë qëndrimit të tij aty, ai ka vënë re se personi në fjalë mbante armë zjarri, përfshirë automatik kallashnikov dhe armë gjahu, si dhe lëvizte shpesh i armatosur.
A. K. ka pretenduar gjithashtu se është paguar me rreth 120 mijë lekë të vjetra dhe se gjatë ditëve të punës ka pasur situata tensioni, pasi i është kërkuar të qëndronte për një periudhë të gjatë pa u larguar nga stani. Ai ka thënë se konflikti ka nisur kur ka kërkuar të largohej për pak ditë për shkak të një problemi familjar.
Sipas deklarimeve të tij, debati mes tyre ka degjeneruar në sharje dhe përplasje fizike, ndërsa në disa raste personi tjetër ka përdorur armën për ta kanosur. Ai ka shtuar se është ndjerë i kërcënuar dhe ka vendosur të largohet me nxitim nga zona, duke zbritur nga mali dhe duke kërkuar ndihmë për t’u larguar me taksi.
Në kallëzim përshkruhen edhe momente të tjera tensioni, përfshirë telefonata paralajmëruese dhe lëvizje të dyshimta në zonë, ndërsa A. K. pretendon se është larguar nga frika për jetën e tij.
Aktualisht, autoritetet po verifikojnë të gjitha deklarimet e bëra dhe po vijojnë hetimet për të sqaruar rrethanat reale të ngjarjes dhe për të dokumentuar çdo element të mundshëm penal.