Agjencia për Parandalimin e Korrupsionit në Mal të Zi ka dalë në përfundimin se ish-presidenti Millo Gjukanoviç ka fshehur një pjesë të pasurisë së tij personale – një koleksion luksoz orësh dore me vlerë të vlerësuar rreth 200 mijë euro.
Sipas raportit zyrtar, Agjencia ka analizuar me imtësi fotografi të publikuara ndër vite nga media malazeze, të shkrepura gjatë paraqitjeve të ndryshme publike të Gjukanoviçit në kohën kur ai mbante postin e presidentit apo të kryeministrit. Në këto foto, ai shfaqej me orë dore të shtatë markave prestigjioze, secila prej të cilave – bazuar në vlerësimin e ekspertëve të provave digjitale – kushton mes 8.000 deri në 59.000 euro.
Raporti thekson se fotografitë janë verifikuar si autentike dhe se asnjë nga këto orë nuk figuron në deklaratat zyrtare të pasurisë që Gjukanoviç ka dorëzuar ndër vite, pavarësisht se konsiderohen pjesë e pasurisë së luajtshme.
Vetë Gjukanoviç, në një reagim të vitit 2021, i kishte quajtur pretendimet për orë me vlerë të lartë “sensacionalizëm dashakeq”, duke shtuar se disa prej tyre nuk i kishte zotëruar kurrë. Ai kishte pohuar gjithashtu se një orë e tipit “Brequet Tourbilion” ishte dhuratë nga një person i afërt që në vitet ’90, para hyrjes së tij në jetën publike.
Por Agjencia e ka rrëzuar këtë shpjegim, duke deklaruar se pretendimi nuk mbështetet me asnjë provë. Madje, sipas ekspertëve të provave digjitale, model i tillë i orës që përmend gjukanoviçi “nuk ekziston”. Për këtë arsye, arsyetimi i tij është cilësuar si i papranueshëm.
Millo Gjukanoviç, një nga figurat dominuese të politikës malazeze që prej fillimit të viteve ’90, ka mbajtur disa herë detyrën e kryeministrit dhe presidentit. Partia e tij ka qeverisur vendin deri në vitin 2020, kur humbi pushtetin pas më shumë se tri dekadash. Mandatin presidencial, Gjukanoviç e mbylli në vitin 2023, pasi u mund nga Jakov Millatoviç.
Sipas procedurave ligjore në fuqi, ish-presidenti ka të drejtë të hapë një proces administrativ kundër vendimit të Agjencisë brenda 20 ditëve.