Policia e Lushnjës ka zbardhur dy raste vjedhjesh të ndodhura brenda dy ditëve në fshatin Plug, ndërsa ka arrestuar autorin e dyshuar, një 36-vjeçar me precedent penal.
Në pranga ka rënë Mariglen Gashi, 36 vjeç, banues në Plug, i dënuar më parë për veprën penale të vjedhjes.
Sipas hetimeve, ai dyshohet se më 16 korrik ka vjedhur dy bateri automjetesh, ndërsa një ditë më pas është futur në një lokal në fshat, ku ka marrë një shumë parash dhe një laptop.
Pas kryerjes së vjedhjes, 36-vjeçari dyshohet se i ka vënë zjarrin lokalit, duke shkaktuar dëme të konsiderueshme materiale.
Policia vijon hetimet për dokumentimin e plotë të ngjarjeve dhe zbardhjen e të gjitha rrethanave të rastit.