Futbolli turk tronditet nga një skandal i ri. Federata Turke e Futbollit ka hapur hetime ndaj mbi 150 arbitra profesionistë për përfshirje në baste.
Presidenti i Federatës, Ibrahim Haciosmanoglu, deklaroi në një konferencë për shtyp se sipas informacioneve nga agjencitë qeveritare, 371 nga 571 arbitra aktivë kanë hapur llogari në kompani bastesh, ndërkohë që 152 prej tyre kanë vendosur baste, përfshirë 7 arbitra dhe 15 asistentë të nivelit të lartë.
Sipas Haciosmanoglu, 10 gjyqtarë kanë bastuar mbi 10 mijë euro në pesë vitet e fundit, ndërsa një prej tyre ka shkuar deri në 18 mijë euro. Disa të tjerë e kanë kryer këtë veprim vetëm një herë.
“Futbolli turk ka nevojë për një ndryshim,” theksoi presidenti. “Detyra jonë është ta ripastrojmë sportin nga ky pisllëk dhe ta çojmë aty ku i takon.”
Ai gjithashtu bëri të ditur se Komisioni i Disiplinës do të merret menjëherë me këto raste, duke hapur rrugën për sanksione të mundshme ndaj gjyqtarëve të përfshirë.