TIRANË– Kryeministri Edi Rama teksa foli për masat e sigurisë të lëshuara nga SPAK për 24 zyrtarë të Universitetit Bujqësor të Tiranës, u shpreh se nuk ka asnjë flagrancë për të goditur një institucion të arsimit të lartë.
Më tej numri një i qeverisë tha se masat që janë lëshuar nga SPAK janë për abuzimet me fondet, duke theksuar se nëse vërtet ka shkelje abuzuesit duhet të shkojnë para drejtësisë.
“Gjëja e parë që më ka shkuar në mendje kam thënë cfarë do mendojnë partnerët austriakë, 24 masa sigurie. Një numër marramendës për një çështje që ka 2-3 vjet dhe që nuk ka asnjë flagrance, asnjë arsye për të krijuar këtë goditje për një institucion të arsimit të lartë.”-tha Rama.
FJALA E RAMËS:
Mbase është e nevojshme të nënvizohet një fakt që kur kemi folur unë jam siguruar që së pari ju nuk jeni një person nën hetim. Ne nuk bëjmë dëgjesa me persona në hetim. Është mirë ta dinë të gjithë se para se ju të kandidoni për rektor i keni drejtuar një letër SPAK ku i keni kërkuar të sqarojë nëse ky kandidim do kishte ndonjë pengesë dhe përgjigja ka qenë për ju që mund të vazhdoni të kandidoni dhe e treta të gjithë duhet ta kuptojnë që shqetësimi shumë i madh në këtë rast nuk lidhet me faktet apo me fajësinë apo pafajësinë e personave, por lidhet me nxitimin për të deklaruar 24 persona në masë sigurie për një universitet që është në kthesë historike dhe që e ka të ardhmen në partneritet strategjik në një prej universiteteve të vjetra të botës. Gjëja e parë që më ka shkuar në mendje kam thënë cfarë do mendojnë partnerët austriakë, 24 masa sigurie. Një numër marramendës për një çështje që ka 2-3 vjet dhe që nuk ka asnjë flagrance, asnjë arsye për të krijuar këtë goditje për një institucion të arsimit të lartë. Aq më tepër që bëhet fjalë fonde të kërkimit shkencor ku nëse ka pasur abuzime, abuzuesit duhet të përgjigjen deri në fund. Këtë nuk e diskuton askush./Radar.al