Qeveria shqiptare shpalli të hënën një situatë të veçantë në tregun e hidrokarbureve, pas rritjes së çmimeve të naftës të ndikuara nga zhvillimet në Lindjen e Mesme.
Vendimi, i firmosur nga kryeministri Edi Rama dhe i publikuar në Fletoren Zyrtare, parashikon aktivizimin e Bordit të Transparencës, i cili do të përcaktojë çmimin maksimal të lejuar për shitjen e naftës. Aktualisht, në shumicën e pikave të karburanteve në Tiranë, nafta tregtohet rreth 214 lekë për litër.
Sipas vendimit, gjatë kësaj periudhe, çmimet e vendosura nga Bordi do të jenë të detyrueshme për të gjitha subjektet që operojnë në tregtimin e nënprodukteve të naftës dhe gazit në vend.
Kompanitë kanë afat deri më 24 mars për të paraqitur përfaqësuesit e tyre pranë ministrisë përgjegjëse për Ekonominë, në mënyrë që të përfshihen në përbërjen e Bordit.
Rritja e çmimeve lidhet me konfliktin në Lindjen e Mesme, ku përplasjet mes SHBA-së, Izraelit dhe Iranit kanë ndikuar në tregjet globale të energjisë, për shkak të tensioneve dhe bllokimit të Ngushticës së Hormuzit, një nga rrugët kryesore të transportit të naftës.
Në kulmin e krizës, çmimi i naftës bruto Brent arriti deri në rreth 120 dollarë për fuçi, duke reflektuar menjëherë rritje edhe në tregun shqiptar, ku çmimet shkuan deri në 219 lekë për litër. Së fundmi, në bursat ndërkombëtare është shënuar një rënie drejt 90 dollarëve për fuçi, pas një pezullimi të përkohshëm të luftimeve.
Megjithatë, në tregun vendas çmimi i naftës vijon të mbetet i lartë, rreth 214 lekë për litër.
Kryeministri Rama ka paralajmëruar gjithashtu se, nëse çmimi kalon mbi 220 lekë për litër, qeveria do të ndërhyjë duke ulur akcizën me 20%.