White House ka reaguar për herë të parë pas incidentit të ndodhur në orët e para të mëngjesit në resortin Mar-a-Lago në Florida, ku forcat e sigurisë qëlluan për vdekje një burrë të armatosur.
Zëdhënësja e Shtëpisë së Bardhë, Karoline Leavitt, deklaroi se Shërbimi Sekret veproi me shpejtësi për të neutralizuar një person që kishte hyrë i armatosur në pronën e presidentit Donald Trump.
Sipas saj, personi ishte i armatosur dhe mbante gjithashtu një enë me benzinë, ndërsa presidenti nuk ndodhej në resort në momentin e incidentit, pasi ishte në Uashington.
Sipas United States Secret Service, i riu u pikas pranë portës veriore të pronës, duke mbajtur atë që dyshohej të ishte një armë gjahu dhe një enë karburanti.
Zëdhënësi i Shërbimit Sekret, Anthony Guglielmi, bëri të ditur se personi ishte rreth 20 vjeç dhe nga Karolina e Veriut. Ai ishte raportuar i zhdukur nga familjarët disa ditë më parë.
Sipas hetuesve, i riu kishte udhëtuar drejt jugut të vendit dhe gjatë rrugës kishte blerë një armë gjahu. Këllëfi i armës u gjet në automjetin e tij. Autoritetet dyshojnë se ai arriti të kalojë portën veriore të kompleksit në momentin kur një automjet tjetër po dilte nga prona.
Ngjarja, përfshirë motivet dhe rrethanat e plota, po hetohet nga Federal Bureau of Investigation, Shërbimi Sekret dhe Palm Beach County Sheriff’s Office.