Një ngjarje e pazakontë është zbuluar së fundmi pasi një azilkërkuesi shqiptar, që pretendon se është homoseksual, i është refuzuar e drejta për të qëndruar në Britani.
Mohimi i azilit mendohet të ketë ndodhur pasi mashkulli në fjalë kreu martesë me një femër.
Bëhet fjalë për shtetasin Esmir Demaj, i cili kërkoi azil në Mbretërinë e Bashkuar me arsyetimin se ishte homoseksual dhe do të përballej me persekutim nëse do të kthehej në vendlindje.
Mirëpo kërkesa e tij u refuzua dhe ai u kthye në Shqipëri vetëm për të bërë një kërkesë të dytë për azil për t’u bashkuar me gruan e tij të re në Mbretërinë e Bashkuar, me argumentin se seksualiteti i tij kishte “ndryshuar”.
Në lidhje me këtë situatë një gjykatë imigracioni vendosi që marrëdhënia e tij me gruan ekzistonte në të njëjtën periudhë kur ai pretendonte se ishte homoseksual.
Ndaj gjykata hodhi poshtë kërkesën e tij si një “përpjekje të qëllimshme” për të mashtruar Ministrinë e Brendshme.
Pas refuzximit të kërkesës së bërë, Demaj u kthye në Shqipëri në prill të vitit 2023. Më pas ai aplikoi për t’u kthyer në Mbretërinë e Bashkuar me justifikimin për t’u bashkuar me gruan e tij, një kërkesë që u refuzua në shtator të vitit 2023.
Shqiptari apeloi kundër vendimit të Ministrisë së Brendshme në një gjykatë imigracioni të nivelit më të ulët.
Gjyqtarja pranoi se fakti që ai ishte “aktualisht në një marrëdhënie heteroseksuale të përkushtuar” nuk do të thoshte domosdoshmërisht se pretendimi i tij i mëparshëm se kishte qenë homoseksual ishte “i pavërtetë”.
Gjykatësi tha se “përvoja tregon se seksualiteti është një spektër”, por gjykatës iu tha se marrëdhënia e Demaj me gruan e tij ndodhi në të njëjtën kohë me homoseksualitetin e tij të pretenduar. Gjykata tha se ai “nuk kishte bërë asgjë” për të njoftuar Sekretarin e Shtetit për rrethanat e tij të ndryshuara.
Duke hedhur poshtë apelin e tij, gjykatësi arriti në përfundimin se Demaj “zgjodhi qëllimisht të mos zbulonte se tani ishte në një marrëdhënie me një grua dhe ishte pajtuar me babanë e tij sepse besonte se kjo nuk do ta ndihmonte të qëndronte në Mbretërinë e Bashkuar”.
Gjyqtari shtoi: “E gjej të mundshme që kjo ishte një përpjekje e qëllimshme për të mashtruar [Ministrinë e Brendshme].”
Sipas të drejtave të nenit tre të KEDNJ-së, njerëzit që mund të persekutohen për shkak të orientimit të tyre seksual mund të kërkojnë azil në Mbretërinë e Bashkuar.