Një incident i rëndë është shënuar në Igumenicë, ku policia greke arrestoi një shtetas shqiptar që drejtonte një autobus ndërkombëtar të linjës “Ahmeti Travel”, pasi u kap duke transportuar dy të huaj pa dokumente.
Autobusi rezulton të jetë në pronësi të Shpëtim Ahmetit, i cili mban edhe funksionin e kryetarit të Partisë Demokratike në Sarandë.
Gjatë kontrolleve rutinë nga autoritetet greke, u konstatua se dy pasagjerë të huaj nuk posedonin dokumentacion të vlefshëm për qëndrim apo dalje legale nga vendi, çka çoi në arrestimin e drejtuesit të mjetit dhe sekuestrimin e autobusit.
Ngjarja ka kaluar në duart e Prokurorisë së Gjykatës së Shkallës së Parë të Thesprotisë, ndërsa ndaj shoferit është ngritur procedim penal për shkelje të ligjit për të huajt.
Ky incident pritet të shkaktojë jo pak zhurmë politike, për shkak të lidhjes së drejtpërdrejtë të kompanisë me një funksionar lokal të opozitës shqiptare.