Gjatë inspektimit të bërë ditën e sotme në rrugën Berat-Ballaban, mes kryeminstrit Rama dhe banorëve si dhe fëmijëve të zonës nuk munguan as batutat.
Teksa përshëndetej me njërin prej tyre, nxënës shkolle i klasës së tetë në Zhitom, (Bardhaj-Drobonik), kreu i qeverisë e pyeti atë për ecurinë në mësime.
Kur nxënësi tregon se kishte marrë 7, kryeministri në një moment “i tërheq veshin” atij.
“Pse shtatë, hajde këtu, hajde! Duhet të futësh në kokë sa më shumë, prandaj e ke kokën, duhet të mësosh sa më shumë sot, që nesër të ecësh para. Unë do të të ndjek ty, dakord, do të të ndjek! Kokën e ke plotë me mend, nuk e ke ujitur, s’e ke prashitur, do të të ndjek këmba këmbës! Shiko si punojnë këta, babai, gjyshi, stërgjyshi, të kanë pajisur me libra, çanta, fletore, në sy të fshatit po te them nuk të ndahem!”, i htotë Rama nxënësit.
Batutat mes tyre u pasuan me të qeshura nga të pranishmit, ndërsa kryeministri këmbëngul të dijë shkolën ku nxënësi në fjalë ndjek studimet.
“Ndjek shkollën 9-vjeçare të Zhitomit”, i përgjigjet nxënësi.
“Jo, jo, thuaja këtu, në sy të fshatit. Do vazhdosh patjetër, thuaj se notat e tua do rriten e do shkojnë te maksimumi, thuaja”, i vë detyrë kryeministri, ndërsa nxënësi e pranon sfidën.
Por batutat nuk mbarojnë këtu.
Pasi mbaroi inspektimin, kryeministri kërkoi të përshëndetej me të pranishmit e më pas ishte në kërkim të djaloshit “që i vodhi vëmendjen”.
“Ku shkoi ky? Iku të mësojë? Aty është? Hajde këtu, hajde. Të bëjmë një fotografi së bashku. Ku më ike, hajde!”, vijon kreu i qeverisë, teksa përqafon dhe puth nxënësin.