Ervin Salianji ka nisur në Durrës turin e foltoreve që, sipas tij, synojnë ringritjen, fuqizimin dhe ripërtëritjen e Partisë Demokratike. Në një dalje për mediat, ai theksoi se politikanët e PD-së duhet t’i rikthehen njerëzve, takimeve dhe bashkëbisedimit të drejtpërdrejtë.
“Do të jem kudo ku më kërkojnë demokratët për t’i dëgjuar dhe për të diskutuar se si PD bëhet më e fortë dhe alternativë që e mund Edi Ramën”, u shpreh ai.
Salianji tha se në takim morën pjesë drejtuesit lokalë të PD-së në Durrës, ish-deputetë dhe kandidatë të votuar më 11 maj, ndërsa theksoi se forumi synon t’u japë zë demokratëve që s’kanë pasur përfaqësim në struktura.
Sa i përket deklaratës së Sali Berishës — i cili i cilësoi foltoret e Salianjit si “aktivitete private” pa lidhje me partinë — Salianji u përgjigj se e vetmja gjë që e udhëheq është interesi i demokratëve: “Çdo takim ka një qëllim: ringritjen dhe zgjimin e Partisë Demokratike.”
Salla e mbushur plot nga simpatizantët në Durrës u pa si një kontrast i fortë me takimet e fundit të Berishës.
Berisha, nga ana e tij, tha se PD-ja ka nisur debatin e hapur dhe se çdo aktivitet i organizuar jashtë forumit zyrtar është “për qëllime personale”.
Salianji i nisi foltoret më 29 nëntor, krahas Ilir Alimehmetit, një prej më të votuarve të PD-së, ndërsa paralelisht PD-ja po vijon turin e saj të foltoreve dhe mbledhjet javore pranë Kryeministrisë.