Në shumë vende të botës, përfshirë edhe Shqipërinë, uji i pijshëm trajtohet me klor për të parandaluar përhapjen e sëmundjeve. Ky proces konsiderohet një “e keqe e domosdoshme”, pasi edhe pse ndihmon në shkatërrimin e baktereve dhe parazitëve, nuk e bën gjithmonë ujin plotësisht të sigurt.
Sipas ekspertëve, klorifikimi i ujit ka qenë vendimtar që prej fillimit të shekullit të 20-të në uljen e epidemive të rënda të lidhura me ujin. Megjithatë, prania e klorit nuk garanton që uji është i pastër nga ndotës të tjerë kimikë apo organikë.
Studimet tregojnë se rreziqet shëndetësore nga klori janë minimale krahasuar me përfitimet e tij, por konsumatorëve u këshillohet të tregojnë kujdes: përdorimi i filtrave shtëpiakë, lënia e ujit në shishe të hapura që klori të avullojë, apo zgjedhja e burimeve të sigurta alternative, janë disa mënyra për të reduktuar ekspozimin.