Kristiano Ronaldo njoftoi blerjen e 25 përqind të aksioneve në UD Almeria, një ekip në Divizionin e Dytë që aktualisht ndodhet në vendin e tretë, një dhe dy pikë pas liderëve, përkatësisht Rasing Santander dhe Kastellon, dhe kanë një shans për t’u ngjitur në Divizionin e Parë.
Lidhur me blerjen e këtyre 25 përqind të aksioneve, vetë Ronaldo deklaroi: “Gjithmonë kam pasur ambicien të kontribuoj në futboll përtej fushës. UD Almeria është një klub me themele të forta dhe potencial të qartë rritjeje. Jam vërtet i emocionuar që do të punoj së bashku me ekipin e menaxhimit për të mbështetur fazën tjetër të zhvillimit të klubit.”
Siç shpjegoi ylli portugez në një njoftim për shtyp të lëshuar këtë të enjte, “investimi do të integrohet në CR7 Sports Investments, një degë e sapokrijuar e CR7 SA, e themeluar për të konsoliduar dhe menaxhuar investimet e Kristiano Ronaldos në sektorin e sportit. CR7 Sports Investments do të veprojë si një mjet për vlerësimin dhe ekzekutimin e mundësive strategjike në fushën e sporteve profesionale.”
Ndërkohë, Mohamed Al Khereiji, president i Almerías, konfirmoi shitjen: “Jemi shumë të lumtur që Kristiano ka zgjedhur klubin tonë për të investuar. Ai konsiderohet lojtari më i mirë i të gjitha kohërave, i njeh shumë mirë ligat spanjolle dhe e kupton potencialin e asaj që po ndërtojmë këtu, si në aspektin e ekipit ashtu edhe të akademisë.”
Ditët e fundit, në Almeria qarkulluan thashetheme se ylli portugez mund ta përfundonte karrierën e tij, përtej moshës 40 vjeç, me ekipin e Almerias. Në realitet, ajo që po finalizohej ishte kjo blerje, investimi i parë i madh i Kristianos në një klub spanjoll./Radar.al