Në kuadër të procesit të rinumërimit të votave në qarkun e Tiranës, janë hapur kutitë e 18 KZAZ-ve, që përfshijnë gjithsej 1282 qendra votimi. Procesi ka nisur fillimisht me numërimin e votave për partitë politike, ndërsa më pas do të vijojë me numërimin e votave preferenciale për kandidatët.
Në nisje të numërimit ishin të pranishëm përfaqësues të PD-së, Ilir Alimehmeti dhe Franc Nuri, të cilët më pas janë larguar nga salla. Po ashtu, procesin e ndoqi edhe Erald Kapri nga Partia Mundësia, ndërsa gjatë vijimit kanë qenë të pranishëm Agron Shehaj dhe Asllan Dogjani.
Gjatë procesit, vëzhguesi i PD-së ka kontestuar vlefshmërinë e një flete votimi, ku në logon e Partisë Socialiste votuesi kishte vendosur firmën e tij. Sipas vëzhguesit demokrat, kjo përbën shenjë identifikuese dhe fleta duhej shpallur e pavlefshme, megjithatë komisioni e ka vlerësuar si të vlefshme.
Sipas të dhënave të para nga 38 qendra votimi të hedhura deri tani në sistem rezulton:
PS ka përfituar +19 vota
PD ka shtuar +1 votë
Euroatlantikët kanë fituar +3 vota
PSD ka humbur -1 votë
Procesi i rinumërimit pritet të vijojë edhe në ditët në vijim, ndërsa të dy kampet kanë shprehur pritshmëri të ndryshme për rezultatet përfundimtare.