Reshjet e dëborës me intensitet të lartë kanë rinisur në zonën e Qafë Thanës, në territorin e Pogradecit, duke krijuar vështirësi në qarkullim.
Aktualisht, lëvizja e automjeteve po kryhet pa nevojën e zinxhirëve, ndërsa kontraktorët ndodhen në terren dhe po kryejnë kriposjen dhe pastrimin e vazhdueshëm të aksit rrugor.
Autoritetet bëjnë me dije se, pas bllokimit të aksit Qukës–Qafë Plloçë katër ditë më parë për shkak të rrëshqitjeve të inerteve, Qafë Thana mbetet aktualisht i vetmi aks i hapur që lidh juglindjen e vendit me Shqipërinë e mesme, duke e bërë këtë segment jetik për qarkullimin.
Sipas parashikimeve meteorologjike, reshjet e dëborës pritet të vijojnë edhe në orët në vijim. Për garantimin e qarkullimit janë angazhuar disa mjete borëpastruese, ndërsa temperaturat në zonë shënojnë rreth 0 gradë Celsius.
Autoritetet u bëjnë thirrje drejtuesve të automjeteve të tregojnë kujdes të shtuar gjatë lëvizjes dhe të ndjekin udhëzimet e policisë rrugore.