Prodhuesi gjerman i automjeteve sportive Porsche ka njoftuar se do të reduktojë edhe 5 000 vende pune në Gjermani deri në fund të vitit 2035, në kuadër të një plani ristrukturimi me vlerë 2.1 miliardë euro, që synon rikthimin e fitimprurësisë së kompanisë.
Kompania ka theksuar se procesi nuk do të përfshijë pushime të detyruara nga puna. Shkurtimet do të prekin kryesisht fabrikën kryesore në Stuttgart-Zuffenhausen dhe qendrën e kërkimit dhe zhvillimit në Weissach.
Sipas Porsche, reduktimi i stafit do të realizohet përmes daljes natyrore në pension, skemave të pensionit të parakohshëm dhe largimeve vullnetare, në bashkëpunim me sindikatat dhe përfaqësuesit e punonjësve.
Paketa e masave përfshin edhe kursime në kostot e personelit, si shtyrjen e një pjese të rritjes së pagave deri në vitin 2035, uljen e shpërblimeve të fundvitit dhe lidhjen më të ngushtë të bonuseve me rezultatet financiare të kompanisë.
Ndërkohë, menaxherët nuk do të përfitojnë rritje të pagës bazë gjatë viteve 2027 dhe 2028, ndërsa puna nga shtëpia do të kufizohet në maksimum tetë ditë në muaj.
Porsche po përballet me një rënie të ndjeshme të fitimeve, të shkaktuar nga rritja e kostove, konkurrenca e fortë në tregun kinez, tarifat amerikane dhe kërkesa më e ulët se pritshmëritë për automjetet elektrike.
Në vitin 2025, fitimi neto i kompanisë ra me 91%, duke zbritur në 310 milionë euro, ndërsa shitjet globale u tkurrën me 10%, në rreth 279 mijë automjete, niveli më i ulët që nga pandemia e COVID-19.